Cylch gorchwyl

Mae Ymgyrch Olympos yn ymchwilio i droseddau tyngu anudon a gwyrdroi cwrs cyfiawnder mewn perthynas â'r erlyniadau.

Mae'r erlyniadau hyn a'r is-bostfeistri yr effeithir arnyn nhw yn rhychwantu pob heddlu. Mae yna bobl dan amheuaeth ar draws y wlad, felly mae yna effaith genedlaethol glir.

Nid ymchwiliad i'r erlyniadau anghywir hyn yw Ymgyrch Olympos. Er bod yr is-bostfeistri wedi dioddef oherwydd tystiolaeth ddiffygiol neu goll, troseddau yn erbyn y wladwriaeth yw’r troseddau sy'n destun ymchwiliad.

Rhychwant

Mae'r achosion a ddygwyd yn erbyn is-bostfeistri yn rhan o'r dystiolaeth ar gyfer gwyrdroi cwrs cyfiawnder, ond does dim angen i bob achos gael ei adolygu.

Mae Gwasanaeth Erlyn y Goron (CPS) wedi adolygu’r strategaeth yma ac wedi cytuno arni. Mae’r CPS o’r farn bod yr ymchwiliad:

• yn bodloni Deddf Gweithdrefn ac Ymchwiliadau Troseddol
• yn bodloni’r gofynion o ran tystiolaeth
• yn bendant ei ffocws ac yn gymesur

Bydd hyn yn gofyn gwaith craffu parhaus i atal y rhychwant rhag mynd yn rhy fawr ac annelwig.

Rhaid i’r ymwneud parhaus â’r dioddefwyr a’r rhanddeiliaid sicrhau:

• bod strategaeth yr ymchwiliad yn cael ei chyfleu'n glir
• bod pob parti yn ymwybodol o ddiben a pharamedrau'r ymchwiliad

O safbwynt yr heddlu, mae hyn yn golygu bod pob heddlu yn cyfrannu at yr ymchwiliad yn hytrach nag ymchwilio i droseddau sy'n gysylltiedig â nhw yn ddaearyddol: nid dyna'r strategaeth.

Pobl dan amheuaeth

Ar hyn o bryd mae unrhyw un sydd o dan amheuaeth yn debygol o berthyn yn fras i'r grwpiau canlynol:

• Ymchwilwyr Swyddfa'r Post
• Cyfreithwyr ac Erlynwyr – rhai mewnol Swyddfa’r Post a rhai allanol - cyfreithwyr sifil a throseddol a gymerwyd ymlaen gan Swyddfa’r Post
• Uwch reolwyr Swyddfa’r Post
• Staff cymorth technegol a staff erlyn Fujitsu

Gall y nifer amrywio gan ddibynnu ar y deunydd a gesglir yn y dyfodol a chasgliad yr ymchwiliad cyhoeddus.