Canllaw cronfeydd ariannol wrth gefn yr heddlu

Cyhoeddwyd y canllaw hwn i’r Comisiynwyr Heddlu a Throseddu gan Weinidog yr Heddlu a’r Gwasanaeth Tân, yn dilyn ymgysylltu â’r sector plismona.

Mae’n nodi disgwyliadau’r Llywodraeth ynglŷn â’r wybodaeth sydd i’w chyhoeddi gan y Comisiynwyr Heddlu a Throseddau am eu strategaethau ar gyfer cronfeydd ariannol wrth gefn.

Bwriad y Llywodraeth yw cynnwys y canllaw hwn yn fersiwn nesaf y Cod Ymarfer Rheolaeth Ariannol (canllaw statudol) sydd i’w roi gerbron y Senedd.

Canllaw

Dylai pob Comisiynydd Heddlu a Throseddu gyhoeddi ei strategaeth cronfeydd wrth gefn ar ei wefan, naill ai fel rhan o’i gynllun ariannol tymor canolig neu mewn dogfen strategaeth cronfeydd wrth gefn ar wahân.

Dylai’r strategaeth cronfeydd wrth gefn gynnwys manylion lefelau’r cronfeydd wrth gefn wedi'u cynllunio presennol a rhai’r dyfodol, gan nodi cyfanswm y cronfeydd wrth gefn a swm pob cronfa wrth gefn benodol a ddelir ar gyfer pob blwyddyn.

Dylai’r strategaeth cronfeydd wrth gefn gwmpasu cronfeydd wrth gefn adnoddau a chyfalaf a darparu gwybodaeth ar gyfer cyfnod y cynllun ariannol tymor canolig (ac o leiaf ddwy flynedd i’r dyfodol).

Dylid darparu digon o wybodaeth fel y gellir deall ar gyfer pa ddiben(ion) y delir pob cronfa wrth gefn a sut mae dal pob cronfa wrth gefn yn cefnogi cynllun ariannol tymor canolig y Comisiynydd Heddlu a Throseddu.

Dylai’r strategaeth gael ei threfnu mewn modd sy’n glir a dealladwy i aelodau’r cyhoedd, a dylai gynnwys:

• sut y cafodd lefel y gronfa gyffredinol wrth gefn ei phennu
• cyfiawnhad am ddal cronfa gyffredinol wrth gefn sy’n werth mwy na phump y cant o’r gyllideb
• manylion y gweithgareddau neu’r eitemau sydd i’w cyllido o bob cronfa wrth gefn wedi’i chlustnodi, a sut y mae’r rhain yn cefnogi strategaeth y Comisiynydd Heddlu a Throseddu a’r Prif Gwnstabl i ddarparu gwasanaeth o ansawdd da i’r cyhoedd. Pan fwriedir i gronfa wrth gefn wedi’i chlustnodi gyllido nifer o brosiectau neu raglenni (er enghraifft, cronfa wrth gefn newid neu drawsnewid), dylid nodi manylion pob rhaglen neu brosiect sydd i’w cyllido

Dylai’r wybodaeth am bob cronfa wrth gefn ei gwneud hi’n glir faint o’r cyllido sy’n dod i’r tri chategori canlynol:

• Cyllid ar gyfer gwariant wedi’i gynllunio ar brosiectau a rhaglenni dros gyfnod y cynllun ariannol tymor canolig presennol.
• Cyllid ar gyfer prosiectau a rhaglenni penodol y tu hwnt i’r cyfnod cynllunio presennol.
• Fel cronfa neu adnodd cyffredinol wrth gefn i ddiwallu anghenion gwariant arall yn unol ag egwyddorion cadarn rheolaeth ariannol dda (e.e. yswiriant).