Cam-driniaeth drwy ddefnyddio delweddau personol heb gydsyniad (pornograffi dial)
Yn yr adran hon:
| Yr hanfodion: eich opsiynau |
| Cael help a chefnogaeth |
| Riportio’r peth i’r heddlu |
| Rhagor o gefnogaeth emosiynol ac ymarferol |
Camdriniaeth drwy ddefnyddio delweddau personol heb gydsyniad, neu bornograffi dial, yw:
- pan fydd rhywun yn rhannu, neu’n bygwth rhannu, lluniau neu fideos personol ohonoch chi heb eich caniatâd
- pan fydd rhywun yn creu, neu’n gofyn i rywun greu, delwedd neu fideo personol ffug ohonoch chi sy’n ymddangos yn real, heb eich caniatâd. Gallai hyn fod yn ffugiad dwfn
Mae’n drosedd rywiol ddifrifol. Os bydd rhywun yn gwneud unrhyw un o’r canlynol heb eich caniatâd, mae’n cael ei ystyried yn gamdriniaeth drwy ddefnyddio delweddau personol heb gydsyniad:
- postio delweddau neu fideos personol ohonoch chi ar-lein
- anfon y delweddau personol ohonoch chi drwy neges destun, ar ap negeseuon (fel WhatsApp), ar gyfryngau cymdeithasol neu drwy ebost
- dangos delwedd bersonol ohonoch chi i rywun yn ffisegol neu’n electronig
- rhannu delweddau neu fideos ffug neu wedi’u golygu ohonoch chi, fel ffugiadau dwfn, sy’n ymddangos yn real
- helpu neu annog rhywun i greu delwedd neu fideo personol ffug ohonoch chi
Os cafodd y lluniau personol eu tynnu heb eich caniatâd, gallai hynny fod yn drosedd hefyd.
Bydd y canllawiau isod yn eich helpu i ddeall yr opsiynau sydd gennych.
Beth gallwch chi ei wneud os bydd hyn yn digwydd
Does dim ffordd gywir neu anghywir o deimlo os bydd rhywun yn rhannu, neu’n bygwth rhannu, delweddau neu fideos personol ohonoch chi heb eich caniatâd. Ac mae’n bwysig gwybod nad eich bai chi yw hynny.
Mae gennych chi opsiynau yn dibynnu ar beth rydych chi am ei wneud nesaf. Mae’r dolenni isod yn mynd i dudalennau pwrpasol sy’n cynnwys rhagor o wybodaeth am bob opsiwn. Does dim rhaid i chi wneud pethau mewn trefn benodol, na gwneud unrhyw un ohonyn nhw hyd yn oed. Chi sydd i ddewis beth bynnag sy’n teimlo’n iawn i chi.
Cael help a chefnogaeth
Mae’r Llinell Gymorth Pornograffi Dial yn gallu eich helpu i dynnu eich delweddau neu fideos personol o fannau ar-lein. Mae adnoddau fel StopNCII.org yn gallu helpu i atal eich delweddau neu fideos personol rhag cael eu llwytho i fyny os oes rhywun yn bygwth eu rhannu.
Mae ein tudalen help a chefnogaeth yn cynnwys rhagor o wybodaeth am y gwasanaethau hyn. Mae hyn yn cynnwys sut gallwch chi gymryd camau drwy roi gwybod yn uniongyrchol i gwmnïau cyfryngau cymdeithasol a gwefannau i oedolion.
Riportio’r peth i’r heddlu
Gallwch chi roi gwybod beth sydd wedi digwydd i’r heddlu. Rydyn ni yma i’ch helpu chi a rhoi unrhyw gefnogaeth sydd ei hangen arnoch chi.
Rydyn ni’n deall y gallech chi fod yn dioddef niwed ar wahân i gamdriniaeth drwy ddefnyddio delweddau personol heb gydsyniad. Er enghraifft, gallech chi hefyd fod yn dioddef blacmel rhywiol, stelcio ac aflonyddu, a cham-drin domestig. Gallai’r pethau hyn gynnwys rhannu, neu fygythiadau i rannu, delweddau neu fideos personol heb eich caniatâd hefyd.
Efallai fod rhywun yn bygwth rhannu delweddau neu fideos ohonoch chi nad ydynt yn rhai personol, ond eu bod yn breifat mewn ffordd arall. Er enghraifft, rhai a allai achosi problemau i chi o fewn eich teulu neu eich cymuned. Gallai hyn gynnwys blacmel.
Does dim angen i chi benderfynu pa drosedd sydd wedi digwydd i chi. Does dim rhaid i chi benderfynu a yw’r hyn sydd wedi digwydd i chi yn cyd-fynd â’r diffiniad cyfreithiol o gamdriniaeth drwy ddefnyddio delweddau personol heb gydsyniad chwaith. Os nad yw rhywbeth yn teimlo’n iawn, gallwch chi roi gwybod am yr hyn sydd wedi digwydd.
Mae rhagor o wybodaeth am beth i’w ddisgwyl ar ein tudalen riportio’r peth i’r heddlu. Mae hyn yn cynnwys y dystiolaeth gallech chi ei chasglu os oes modd.
Rhagor o gefnogaeth emosiynol ac ymarferol
Os bydd rhywun yn rhannu, neu’n bygwth rhannu, delweddau neu fideos personol ohonoch chi, gallech chi deimlo ofn, pryder, a theimladau o ddrwgdybiaeth ac ymyrraeth â’ch preifatrwydd. Neu gallech chi ymateb mewn ffordd arall.
Sut bynnag rydych chi’n teimlo, mae sefydliadau cymorth ac elusennau sy’n gallu eich helpu.
Mae’r rhestr lawn o opsiynau ar ein tudalen rhagor o gefnogaeth emosiynol ac ymarferol.